ჩვენ შესახებ

საქართველოს მთავრობის 2022 წლის 14 ნოემბრის №2105 განკარგულებით მოწონებული იქნა საქართველოს მთავრობას, სს „ელექტროენერგეტიკული სისტემის კომერციულ ოპერატორსა“ და შპს „ნახიდური ჰესს“ შორის ხელშეკრულება. აღნიშნული განკარგულების საფუძველზე, 2022 წლის 1 დეკემბერს საქართველოს მთავრობას (ეკონომიკის და მდგრადი განვითარების სამინისტრო), სს „ელექტროენერგეტიკული სისტემის კომერციულ ოპერატორსა“ და შპს „ნახიდური ჰესს“ შორის გაფორმდა განხორციელების ხელშეკრულება, რომლის მიზანს წარმოადგენს „ნახიდური ჰეს“-ის ჰიდროელექტროსადგურის განხორციელება (მშენებლობა, ფლობა, ოპერირება) კომპანიის მიერ საქართველოს კანონმდებლობისა და ხელშეკრულებით განსაზღვრული პირობების შესაბამისად.

შპს „ნახიდური ჰესი“ ახორციელებს ბოლნისის მუნიციპალიტეტში მდ. ხრამზე 7,2 მგვტ დადგმული სიმძლავრის დერივაციული ტიპის ჰიდროელექტროსადგურის (ნახიდური ჰესის) მშენებლობისა და ექსპლუატაციის პროექტს — ბოლნისისა და თეთრიწყაროს მუნიციპალიტეტების საზღვარზე, სოფ. ნახიდურის მიმდებარედ. მდ. ხრამის მარცხენა სანაპირო შედის თეთრიწყაროს მუნიციპალიტეტში, ხოლო მარჯვენა სანაპირო — ბოლნისის მუნიციპალიტეტში. პროექტის შემადგენლობაში შედის: სათავე ნაგებობა, თევზსავალი, სადაწნეო მილსადენი, მიწისზედა ჰესის შენობა და გამყვანი არხი. გათვალისწინებულია დღე-ღამური რეგულირების ტიპის ჰესის მოწყობა. სათავე კვანძი განთავსდება ზღვის დონიდან 445 მ ნიშნულზე, დაგეგმილია 18 მ სიმაღლის წყალსაშვიანი კაშხლის მოწყობა. ჰიდროელექტროსადგური წელიწადში გამოიმუშავებს 51 მლნ კვტ/სთ-ს, მშენებლობის ხანგრძლივობა შეადგენს 30 თვეს, ხოლო პროექტის საინვესტიციო ღირებულებაა 16 მილიონი აშშ დოლარი. პროექტი ხორციელდება „საქართველოს ბანკის“ ხელშეწყობით.

2026 წელს იგეგმება ობიექტის დასრულება და ექსპლუატაციაში გაშვება. საქართველოში მიმდინარე ენერგეტიკული პროექტებისგან განსხვავებით, ნახიდური ჰესი რეგულირებადია და ვფიქრობთ, მეტად საჭირო და მნიშვნელოვანია საქართველოს ენერგეტიკული სისტემისათვის.